အသက်ပိုရှည်စေဖို့ ၁၀ မိနစ်ပဲ အချိန်ပေးပါ

အလေ့အကျင့်ဆိုတာ ကျွန်တော်တို့ ဘ၀မှာ အတော်လေး အရေးကြီးပါတယ်။ ကိုယ်တိုင်စိတ်ပါလို့ဖြစ်စေ မပါပဲဖြစ်စေ အမြဲစွဲစွဲမြဲမြဲလုပ်ဖြစ်နေတဲ့အရာတွေကို အလေ့အကျင့်လို့ ခေါ်ဆိုနိုင်ပါတယ်။

ဒီထဲမှာမှ ကောင်းတဲ့အရာလေးတွေ နေ့စဉ်လုပ်သွားရင် ပိုကောင်းတဲ့ မနက်ဖြန်တွေ ပိုင်ဆိုင်လာနိုင်ပါတယ်။ ပေါ့ပေါ့နေ ပေါ့ပေါ့စားတဲ့ အလေ့အကျင့်တွေ စွဲနေရင်တော့ မကောင်းဘူးပေါ့။

ဒါကြောင့် အခုအောက်မှာ ပြောပြပေးသွားမှာကတော့ သင့်ကျန်းမာရေး ပိုကောင်းလာဖို့ လိုက်နာလုပ်ဆောင်သွားသင့်တဲ့ အလေ့အကျင့်လေးတွေပါ။

တစ်မျိုးစီကို ၁၀ မိနစ်တောင် အချိန်မကုန်ဘဲ ပြုလုပ်နိုင်ပြီး ရေရှည်မှာ ကျန်းမာရေးအတွက် ကောင်းကျိုးအများကြီး ပေးနိုင်တာကြောင့် ဒီနေ့ပဲ စလုပ်ကြည့်လိုက်ကြရအောင်ပါ။

၁။ နှလုံးသွေးလည်ပတ်မှု ကောင်းပါစေ

နှလုံးကျန်းမာရေးအတွက် တစ်ပတ်ကိုအနည်းဆုံး ၂ နာရီ (တစ်ခါလုပ် မိနစ် ၃၀) လောက် အချိန်ပေးပြီး လေ့ကျင့်ခန်း လုပ်သင့်ပါတယ်။

ဒီလောက်အကြာကြီး အချိန်မပေးနိုင်ရင်လည်း တစ်ခါလုပ်ရင် ၁၀ မိနစ်လောက်နဲ့ အကြိမ်ရေတိုးပြီး လေ့ကျင့်ခန်း လုပ်ပေးသင့်ပါတယ်။ ဘာလေ့ကျင့်ခန်းမှ မလုပ်ဖြစ်တာထပ်စာရင်တော့ ပိုကောင်းတာပေါ့။

၂။ ရေသောက်ပါ

ကျန်းကျန်းမာမာ နေထိုင်နိုင်ဖို့ အခြေခံအကျဆုံးစည်းမျဉ်းတွေထဲမှာ ခန္ဓာကိုယ်ကို ရေဓာတ်ဖြည့်ဆည်းပေးဖို့လည်း ပါ၀င်ပါတယ်။ ရေဓာတ် လုံလုံလောက်လောက် ရှိရင်

သွေးလည်ပတ်မှု ပိုကောင်းတယ်၊ အာဟာရဓာတ်တွေ စုတ်ယူမှုပိုကောင်းမယ်၊ ကိုယ်တွင်းကအညစ်အကြေးတွေလည်း ပိုစွန့်ပစ်နိုင်ပါလိမ့်မယ်။

၃။ အပြင်ထွက်ပါ

အားတိုင်းအိမ်ထဲမှာပဲ ခွေမနေပဲ အပြင်ထွက်လမ်းလျှောက်တာ၊ အချိန်ပိုပေးနိုင်ရင် မွန်းကျပ်တဲ့ မြို့ပြထဲက ခဏလောက်ထွက်ပြီး ခရီးတွေ သွားပစ်ပါ။

ခြေလျင်တောင်တက်တာမျိုး၊ တောတွင်းစခန်းချ ခရီးထွက်တာမျိုးတွေက နောက်ပိုင်းခေတ်စားလာသလို ပိုလည်းသွားလာရတာ အဆင်ပြေလာပါတယ်။ သဘာ၀ရဲ့လတ်ဆက်တဲ့လေကို တဝြကီး ရှူရှိုက်ပြီး စိတ်ရောကိုယ်ပါ အနားယူလိုက်ပါ။

၄။ အစာကို စနစ်တကျ စားသောက်ပါ

တစ်နေ့တစ်နေ့ ကိုယ်ဘာစားမယ်ဆိုတဲ့ ဆုံးဖြတ်ချက်ကလည်း ကျန်းမာရေးအတွက် အရမ်း အရေးကြီးပါတယ်။ အကောင်းဆုံးကတော့ သန့်ရှင်းလတ်ဆတ်တဲ့ အစားအသောက်ကို အချိန်မှန် စားသောက်ပေးပါ။

အစားအသောက်ကို စနစ်တကျစားရရင် ကိုယ်အလေးချိန်လည်း ထိန်းပြီးသားဖြစ်သလို ကျန်းမာရေးအတွက်လည်း သင့်လျော်မှာပါ။ ဝိတ်လျှော့ချင်စောနဲ့ လုံလောက်တဲ့ အာဟာရရအောင် မစားရင်လည်း ကျန်းမာရေး ထိခိုက်နိုင်ပါတယ်။

၅။ ရေနွေးကြမ်း သောက်ပါ

လက်ဖက်ခြောက် ခပ်ထားတဲ့ရေနွေးကြမ်းကို ဆိုလိုတာဖြစ်ပြီး လက်ဖက်ရွက်ထဲမှာ ဓာတ်တိုးဆန့်ကျင်ပစ္စည်းတွေ ပါ၀င်တာကြောင့် ကင်ဆာရောဂါအပြင် တခြားနာတာရှည်ရောဂါတွေကို တိုက်ခိုက်နိုင်စွမ်း ရှိပါတယ်။

ဒါ့အပြင် သွေးတွင်းကိုလက်စထရောဓာတ်လည်း လျော့ကျစေသလို အရိုးပွရောဂါကို ကာကွယ်ပေးပါတယ်။

၆။ စဉ်ဆက်မပြတ် သင်ယူပါ

သတင်းစာထဲက စိတ်၀င်စားစရာ သတင်းတစ်ပုဒ်ကို ဖတ်ပြီး အတွေးနယ်ချဲ့တာပဲဖြစ်ဖြစ်၊ စာလုံးဆက်ကစားတာပဲဖြစ်ဖြစ် သင့် ဦးနှောက်ကို အသုံးပြုရတဲ့ကိစ္စတိုင်းက ဦးနှောက်အတွက် အကျိုးဖြစ်ထွန်းစေပါတယ်။

တက္ကသိုလ်ပြီးသွားတာနဲ့ လေ့လာသင်ယူမှုတွေကို ရပ်တန့်ပစ်စရာ မလိုအပ်ပါဘူး။ ဒါ့ကြောင့်လည်း “ပညာလို အိုသည်မရှိ” ဆိုတဲ့စကား ပေါ်ပေါက်လာတာပဲ မဟုတ်လား။

၇။ မိသားစု၊ မိတ်ဆွေအပေါင်းအသင်းတွေနဲ့ နေထိုင်ပါ

စား၀တ်နေရေးအတွက် ရုန်းကန်လှုပ်ရှားနေရတာနဲ့ ကိုယ့်ကိုချစ်တဲ့မိသားစု၊ သူငယ်ချင်းတွေနဲ့ အဆက်အသွယ် ပြတ်ကုန်တာမျိုး မဖြစ်သင့်ပါဘူး။

လူတစ်ယောက် အသက်ရှည်ရှည် နေနိုင်ရေးမှာ အဲ့ဒီလူ ဘယ်လောက် အထီးကျန်မှုခံစားရသလဲဆိုတာကလည်း အရေးပါပါတယ်။ ဒါကြောင့် အမြဲတစေ တွေ့ဆုံဖို့အဆင်မပြေရင်တောင် ဖုန်းမကြာမကြာ ဆက်ပြီး စကားစမြည် ပြောဆိုပေးသင့်ပါတယ်။

၈။ သွားသန့်ရှင်း ရေးဂရုစိုက်ပါ

၁၀ မိနစ်တောင် မကြာတဲ့ ရိုးရှင်းလှတဲ့ ဒီအလုပ်ကို လူအတော်များများလုပ်ရမှာ ပျင်းကြပါတယ်။ သွားသန့်ရှင်း မှန်မှန်လုပ်ရင် သွားပိုးစားတာ၊ သွားဖုံးရောင်တာတွေ မဖြစ်အောင် ကာကွယ်ပေးနိုင်ပါတယ်။

သွားဖုံးရောင်တဲ့သူတွေဟာ နှလုံးဖောက်ခြင်း၊ လေဖြတ်ခြင်းနဲ့ ဆီးချိုရောဂါတွေပိုဖြစ်လွယ်တာကို တွေ့ရပါတယ်။ ဒါကြောင့် သင့်သွားလေးတွေကို ဒီနေ့ပဲ စတင်ဂရုစိုက်လိုက်ပါ။

၉။ ရယ်မောပါ

“ရယ်သောသူ အသက်ရှည်၏” ဆိုတဲ့စကားပုံက အလကား ပေါ်လာတာ မဟုတ်ပါဘူး။ သိပ္ပံပညာရှင်တွေရဲ့ လေ့လာမှုတွေအရ အားရပါးရ ရယ်မောလိုက်တာကြောင့် သွေးပေါင်ချိန် လျော့ကျစေခြင်း၊ စိတ်ဖိစီးမှုလျော့ကျစေခြင်း၊

နှလုံးသွေးလည်ပတ်မှုအားကောင်းစေခြင်းအပြင် စိတ်ပျော်ရွှင်စေတဲ့ အန်ဒေါ်ဖင်းဟော်မုန်းတွေပါ ထွက်လာစေတယ်ဆိုတာ သက်သေပြထားပါတယ်။ ဒါကြောင့် ပျော်ရွှင်စရာကိစ္စလေးတွေ ကြုံလာရင် အားရပါးရ ရယ်မောပစ်လိုက်ပါ။

၁၀။ လမ်းလျှောက်ဖို့သာ ရွေးချယ်ပါ

တကယ်လို့ ကိုယ့်ရုံးက အထပ်မြင့်အဆောက်အအုံတစ်ခုရဲ့ အပေါ်ပိုင်းကျကျလောက်မှာ ရှိနေမယ်ဆိုရင်တော့ ဓာတ်လှေကား၊ စက်လှေကားစီးတာမပြောလိုပေမဲ့ ၃၊ ၄ ထပ်လောက်ပဲ သွားရမှာဆိုရင် လှေကားအတိုင်း လမ်းလျှောက်သာတက်ပါလို့ အကြံပြုလိုပါတယ်။

လမ်းလျှောက်တယ်ဆိုတာ အကောင်းဆုံးနဲ့ အရိုးရှင်းဆုံး အားကစားနည်းတစ်ခုပါ။ အားကစားခန်းမှ သွားဖို့ အချိန်သပ်သပ် မပေးနိုင်ရင်တောင် တစ်ရက်ကို အနည်းဆုံး မိနစ် ၂၀ လောက် လမ်းလျှောက်နိုင်အောင် ကြိုးစားကြည့်ပါ။

၁၁။ အမျှင်ဓာတ်ကြွယ်၀တဲ့ အစားအသောက်တွေ စားပါ

အမျှင်ဓာတ်ပါ၀င်တဲ့ အစားအသောက်တွေစားရင် အူမကြီးကျန်းမာရေးကို ကောင်းမွန်စေသလို သွေးတွင်းအဆီဓာတ်ကိုလည်း လျော့ကျစေပါတယ်။

ဒါ့အပြင် အစာချေဖျက်ရ ပိုမိုလွယ်ကူစေတာကြောင့် ၀မ်းချုပ်တာမျိုးတွေ တော်ရုံမဖြစ်နိုင်တော့ပါဘူး။ အစေ့အဆံ၊ ကစီဓာတ် မပါ၀င်တဲ့ဟင်းသီးဟင်းရွက်နဲ့ အသီးအနှံတွေ များများသာ စားသုံးပေးပြီး အ၀မလွန်အောင် ထိန်းချုပ်နိုင်ပါတယ်။

၁၂။ လက်ဆေးပါ

နောက်ဆုံးသိထားရမယ့်တစ်ချက်ကတော့ လက်မကြာခဏ ဆေးကြောပေးဖို့ပါ။ လက်တွေဟာ အမြဲတစေ အရာ၀တ္ထုမျိုးစုံကို ကိုင်တွယ်သုံးစွဲနေလေ့ရှိတာကြောင့် ခန္ဓာကိုယ်မှာ အညစ်ပတ်ဆုံး အစိတ်အပိုင်းတစ်ခု ဖြစ်လို့နေပါတယ်။

ဒါကြောင့် လက်ကို မကြာခဏ ဆေးကြောသင့်ပြီး အထူးသဖြင့် အိပ်သာတက်ပြီးနဲ့ အစာမစားခင်မှာ သေချာကို ဆပ်ပြာနဲ့ တိုက်ချွတ်ဆေးရပါမယ်။

လက်ကိုသေချာဆေးရုံနဲ့တင် ကူးစက်ရောဂါဖြစ်ပွားမှုကို ရာခိုင်နှုန်း အတော်များများ လျှော့ချပေးနိုင်ပါတယ်။

Leave a Reply

Your email address will not be published. Required fields are marked *